क्रिकेटरको दशैं : घर सम्झिँदा खल्लो, देशका लागि खेल्दा गर्व

0 minutes, 0 seconds Read
Spread the love

नेपालीहरुको ठूलो पर्व बडादशैंको बेलामा नेपालका सिनियर र यू–१९ दुवै टिमका खेलाडी खेल्नमा व्यस्त छन् । बडादशैंमा आफन्त र परिवारसँग हुने भेट र पारिवारिक माहोलभन्दा पर रहेर यो पालि राष्ट्रिय टिमले टिममै दशैं मनाउने छ ।

सिनियर टिमले टी–२० विश्व कप एसिया क्षेत्र छनोट अघि हङकङ र यूएईसँग त्रिकोणात्मक सिरिज खेलिरहेको छ । त्यसलगत्तै नेपालले काठमाडौंमै टी–२० विश्वकप छनोट खेल्ने छ ।

सिनियर टिमका केही खेलाडी जसको घर परिवार काठमाडौं र आसपासमा छ उनीहरु ६ गते नवमीका दिन यूएईसँगको खेल सकेर घर जाने तयारीमा छन् । दशैंमा आफन्त र ठूलाबडाको हातबाट टीका थाप्न हवाईमार्गले भ्याउने ठाउँका खेलाडी पनि घर जाँदैछन् । केही खेलाडी भने टिमसँगै दशैं मनाउँदै छन् ।
सिनियर टिमका ओपनर ब्याटर कुशल भुर्तेल भने यसपटक घर जाँदैनन् । खेल भएकाले उनले टिमसँगै रहेर दशैं मनाउने छन् । उनले भने, ‘गेम छ । म यसपटक घर जाँदिनँ ।’
राष्ट्रिय टिममा यही त्रिकोणात्मक सिरिजको पहिलो खेलबाट टी–२० अन्तर्राष्ट्रियमा डेब्यु गरेका श्याम ढकाल (मौसम) भने टीकाको अघिल्लो दिन खेल सकेर घर जाँदैछन् । उनले भने, ‘टीकाको दिनमा गेम छैन अघिल्लो दिन गेम सकेर घर जान्छु ।’ उनी टीकाको भोलिपल्ट पुनः टिममा फर्किने छन् ।
राष्ट्रिय टिमका म्यानेजर रहेका सुमनराज कार्की भने टिममा पनि दशैं मनाउने तयारी चलिरहेको बताउँछन् । ‘हालसम्म केही कुरा भएको छैन तर गेम भएकाले यसबारे पनि हाम्रो योजना बन्दैछ,’ उनले भने ।

यु–१९ टिमको दशैं देश बाहिर

यू–१९ क्रिकेट टिम भने एसीसी प्रिमियर कप क्रिकेट खेल्न मलेसियामा छ । दशैंको बेला घरभन्दा पर हुँदा खल्लो लागिरहेको खेलाडीहरु बताउँछन् । टिमका स्पिनर सुवास भण्डारी भन्छन्, ‘दशैंमा घर नहुँदा घरको याद त आइरहेको छ । तर पनि नेपालको लागि खेल्न आएकाले देशलाई पदक जितेर आउनु छ,’ उनले मलेसियाबाटै अनलाइनखबरसँग कुरा गर्दै भने ।

पहिलो पटक घर बाहिर बसेका खेलाडीलाई घर परिवार र दशैंको माहोल याद आइरहेको भए पनि राष्ट्रिय जिम्मेवारी पूरा गर्न आएकोमा उत्तिकै गर्व रहेको उनले बताए ।

घरमा हुन नपाउँदा केही खिन्न भएपनि देशको प्रतिनिधित्व गर्न पाउँदा उत्तिकै खुसी छन् उनी । ‘अब फाइनल जितेर देशलाई एसिया कपमा पुर्याएपछि हाम्रो लागि त्यही नै दशैं हुन्छ,’ सुवासले भने, ‘घरको माहोल सम्झना आउँछ तर नेपालको लागि खेल्ने भएपछि सधैं दशैंमा घर कहाँ भइन्छ र !’ जापानमाथि १४४ रनको जित हात पार्दै नेपालले यू–१९ एसिया कपमा स्थान बनाइसकेको छ ।

सुदूरपश्चिमका तीव्र गतिका बलर हेमन्त पनि घरको याद आइरहेको बताउँछन् । पहिलो पटक परिवारसँग नरहेका उनी भन्छन्, ‘घर परिवारको याद आउँछ । पहिलो पटक हो यसरी दशैंको बेला खेल परेर बाहिर भएको ।’

उनले अघि भने, ‘खेल्न आएका हौं र खेल जितेर दशैं मनाउने हो ।’ अनलाईनखबरबाट

Similar Posts

Leave a Reply

Your email address will not be published. Required fields are marked *