काठमाडौं– रामबाबु गुरुङको निर्देशन रहेको ‘डिग्री माइला’ सिनेमा नेपालसँगै अष्ट्रेलिया र अमेरिकामा पनि चैत ३० (अप्रिल १२) देखि प्रदर्शनमा आउने भएको छ । निर्माण पक्षका अनुसार अष्ट्रेलियाका प्रमुख शहरहरू सिड्नी, व्रिजबेन, क्यानबेरा, एडिलेट, होबर्ट, डर्विन, मेर्लवर्न, पर्थ तथा लउनसेस्टनमा रिलिज हुनेछ।

त्यस्तै अमेरिकामा भने ४० भन्दा बढी सहरमा ४ सय शोहरु हुने जानकारी निर्माण पक्षले दिएको छ । डायस्पोरामा प्रदर्शन अधिकार सेभेन सिज इन्टरटेनमेन्टले लिएको छ । निर्माण पक्षले गत हप्ता चलचित्रको ट्रेलर सार्वजनिक गर्दै नेपालको प्रदर्शन मिति तोकेको थियो । सिनेमामा नायिका आँचल शर्मा र नायक दयाहाङ राई जोडी बनेका छन् । सिनेमामा उनीहरूको अन्तरजातीय प्रेम हेर्न सकिने निर्माण पक्षले बताएको छ ।

सिनेमामा दया-आँचलसँगै विजय बराल, बुद्धि तामाङ, प्रकाश घिमिरे, माओत्से गुरुङ आदिको प्रमुख भूमिका रहेको छ । सुस्मा फिल्मस्सँगको सहकार्यमा बाँसुरी फिल्मस्को ब्यानरमा निर्माण भएको यो चलचित्र मास्टर डिग्री पास गरेका एक शैक्षिक बेरोजगारको कथामा आधारित रहेको बताइएको छ ।

विशाल गुरुङ, मणिराम पोखरेल, मधु मिजार तथा सुष्मा गुरुङ यस चलचित्रका निर्माता हुन् भने कार्यकारी निर्माताका रुपमा क्रिश लामा छन् ।